唔知有幾多人留意到 Kit Kat每隔一般日子就會出一D特別的味道。
最初係由一盒「熱情果味」 Kit Kat開始……

好幾年前我好沉迷上 News Group ，響果度我認識左一班養狗的谷友，其中有一位谷友，佢本身並冇養狗，只係因為佢個同事係谷友之一，而又覺得我地成班幾岩傾，所以佢又加入埋呢個谷。

大家響谷度認識左幾年，由素未謀面變成咩都可以傾的朋友。其中一次我因為一盒「熱情果味」 Kit Kat 幫我解決左一件唔開心的事。我響谷度提起呢件事，原來大家都唔知有「熱情果味」的 Kit Kat。我第二日就買左2盒「熱情果味」Kit Kat 速遞到呢位谷友的公司。我覺得，我當時應該唔係一心想請佢食呢盒 Kit Kat的，因為當時我同佢並唔係太熟。我估我當時應該係想送俾佢同事，因為佢同事先係有養狗的谷友，不過反正佢地兩個同一間公司，我咪順便送埋俾佢囉。我當時又點會估到，呢件事連我自己都忘記左，佢反而一路都記得。

開心上谷 0既日子冇幾耐就完結左喇！因為我公司唔可以再連線到任何 News Group，我同呢班谷友亦少左聯絡。就係呢個時候，呢位冇養狗的谷友亦都因為一D原因離開左 News Group 。而我同佢就由果時開始慢慢變成mail友。我地通常一個星期都會通 mail 2-3日，講下生活的事，身體狀況，我就講下亞 Pooh，佢又講下龍貓，講下整野食，講下買晶晶。我地後來仲一齊去買晶晶添！唔知幾時開始，我地一發現有新口味的 Kit Kat，就會買黎送俾對方，有時真係會買重複架！有一次我地講起呢件事，我覺得 Kit Kat 就好似我同佢之間的一條線，我地見到 Kit Kat 會好自然諗起對方，好自然會買埋對方，不知不覺間我地成為好朋友。一對成年都唔會通3次電話，但係就成日通 mail 的好朋友。
最可惜就係早期我地買過的 Kit Kat，食左覺得好好味就算，冇話留低果盒或者影低相，依家我每次都會影相作為記錄。記得佢講過「一盒 Kit Kat 有2包，最好就係扲返屋企同另一半分享。分享 Kit Kat， 分享脂肪。一齊食，一齊肥。」每次我一諗起，我就覺得好好笑，唔知再過10年20年，我地仲會唔會買 Kit Kat 俾對方呢！為左 Keep 住我地呢段 Kit Kat 情緣，我會努力D行街搵 Kit Kat，冇理由次次都俾佢快過我搵到新口味0既！