我PoohPooh響屋企不嬲係如珠如寶的，人地一定以為我好身嬌肉貴啦，其實我係一個正宗乞兒肚！其他D狗狗轉糧起碼都要幾日時間適應，我就從來都冇呢個問題，我去到邊個狗地屋企，都可以食佢地D糧。平時游完水水肚痾一下，我都只係當洗下腸排下毒。雞牛羊魚蝦蟹樣樣唔驚，西瓜榴槤士多啤梨蘋果橙款款鍾意，幾乎係狗狗食得0既我都食，狗狗唔食得0既媽媽都唔會俾我食。

星期六下午D腸胃就開始有D怪怪地，攪到我都冇乜心機，連晚餐都唔係好想食。點知訓到半夜就開始嘔，頭1-2次將D狗糧嘔返哂出黎，第3次就嘔左D黃黃水，第4-5次就嘔左D白色同透明的黏黏液體。媽媽成晚都冇乜點訓，一聽到我嘔嘔的聲音就彈起，幫我抹咀同抹地。最後仲嘔左一灘杰杰的豬血出黎，媽媽話我嘔血，驚我係內臟出血，一定要我去睇醫生，點知落到街街，原來便便都已經有血喇！爸爸媽媽都好擔心呀！

因為媽媽堅持我冇食錯野，又冇響街街LAM到農藥，所以醫生都唔知我點解會咁，其實我自己都唔知。醫生幫我探熱，體溫正常，心跳正常應該唔係中毒，摸我肚肚又冇痛，不過D腸就有少少咕嚕咕嚕響。醫生話估計係腸胃炎，可能係D腸胃磨擦損左所以有少少出血，應該唔係內臟出血咁嚴重。媽媽聽到先放心少少咋！

返到屋企食左藥我就好倦好眼訓，醫生又要我禁食24小時，其實我都冇胃口食野啦，連爸爸扲出我最愛的雞條，我都冇興趣。爸爸媽媽成個星期日就輪流抱住我陪住我訓覺覺。到左夜晚落街街，我仲係有少少血便便，臨訓前再食左藥，不過訓到12點幾又再嘔左1次，呢次已經冇嘔血喇，只係嘔左黃黃綠綠一灘野出黎。

星期一朝早，媽媽一早就起身整左白烚雞絲飯俾我做早餐，我開始都有D胃口，食左半碗飯，成日都響屋企訓覺覺。但係仲有少少嘔同少少血便便呀！婆婆因為太擔心我，仲特登入黎DB探我，我見到婆婆好開心呀！晚餐果時婆婆仲餵我食雞肉添。

星期二朝早6點鍾開始，我又嘔左3次，不過已經冇血喇，但係便便仲有少少血。媽媽放假成日都陪住我，幫我將D碗碗兜兜，玩具，窗臺地板全部消毒。因為我日日都係半夜同未天光就開始嘔，攪到媽媽好似好倦咁，所以我就叫埋熊熊搵媽媽玩下啦！但係玩左幾下，我就冇力玩喇！

我咁大個女都未試過病得咁嚴重，今次真係好辛苦呀！我好怕媽媽迫我食藥丸，一次仲要食5粒添，好慘呀！好想快D好返唔再嘔唔再痾，唔駛再食藥！